Hordhac 

Luulyo 2025 waxay ahayd bil aad loo xoojiyey iskaashiga bahwadaagta, dardargelinta nidaamyada Kormeerka & Qiimeynta (K&Q), iyo dhiirrigelinta maalgashi la jaanqaada mudnaanta qaranka. Dowladda Federaalka iyo Qaramada Midoobay waxay si qoto dheer uga wada hadleen jihaynta iskaashiga 2026–2030, iyagoo dib u eegay hirgelinta Qorshaha Iskaashiga ee 2021–2025.  Wasaaraddu waxay soo bandhigtay e-NIMIS—aalad casri ah oo xoojinaysa xog-ururinta iyo kormeerka waxqabadka intii lagu guda jiray shirka Guddi-hoosaadka Tiirka Horumarinta Arrimaha Bulshada. 

Dhanka kor u qaadista aqoonta dhaqaalaha, safarka waxbarasho ee K&Q ee Yugaandha wuxuu dhaliyey warbixin-barasho, heshiisyo iskaashi, iyo qorshe howleed lagu tayeynayo nidaamka qiimeynta qaranka.  Sidoo kale, shir farsamo oo lala yeeshay JICA ayaa diiradda saaray shaqo-abuurka dhallinyarada iyo ganacsiga bulshada nugul. 

Dhanka maalgashiga, Wasiirka iyo Danjiraha Boqortooyada Sacuudiga waxay ka wada hadleen xoojinta maalgashiga, halka Wasaaraddu daah-furtay warbixinta lixaad ee “Fursadaha Maalgashi ee Adeegyada Mihnadleyda.”