HORDHAC

Bishii Nofeembar 2025 waxay ahayd bil horumar weyn ay ku talaabsatay Wasaaradda Qorsheynta, Maalgashiga iyo Horumarinta Dhaqaalaha (WQM&HDH), iyadoo xaqiijisay tallaabooyin muhiim ah oo dhanka dib-u-habaynta hay’adaha, xoojinta iskaashiga heer federaal iyo heer dowlad-goboleed, iyo adkeynta wadashaqeynta caalamiga ah si loo dardargeliyo hirgelinta Qorshaha Isbeddelka Qaranka (NTP 2025–2029). Waxyaabaha ugu waaweyn waxaa ka mid ahaa ansixinta sharciga dhismaha Hay’adda Maalgashiga Soomaaliya, hirgelinta Siyaasadda Shaqaalaha iyo Nidaamka cusub ee HR/ERP, wadatashiyo ballaaran oo lala yeeshay Dowlad-Goboleedyada si loo dhamaystiro Istaraatiijiyadda Hirgelinta NTP, iyo qabsoomidda Shirweynaha 2-aad ee Kormeerka & Qiimeynta oo lagu daahfuray Manhajka iyo Hagaha Qiimeynta Qaranka. Wasaaraddu sidoo kale waxay ansixisay natiijooyinka Qiimeynta QHQ-9, waxay dardargelisay daadejinta SDG-yada, kana qeyb gashay shirar muhiim ah oo caalami ah oo ka dhacay Doha iyo Brazil. Intaas waxaa dheer, xiriirka bah-wadaagta sida Midowga Yurub, Qaramada Midoobay, UNFPA, Brazil iyo Machadka Qorsheynta Carabka ayaa sii adkeeyay himilada Wasaaradda ee ku dhisan qorsheyn xog-ku-saleysan, awooddhisid hay’adeed, iyo hogaaminta horumarka waara ee Soomaaliya.