HORDHAC

Warsidaha bishan wuxuu soo bandhigayaa waxqabadkii ugu muhiimsanaa ee Wasaaradda Qorsheynta, Maalgashiga iyo Horumarinta Dhaqaalaha Dowladda Federaalka Soomaaliya intii lagu jiray bisha Luulyo 2026.

Bishan, Wasaaraddu waxay xoogga saartay dardargelinta hirgelinta Qorshaha Isbeddelka Qaranka (NTP 2025-2029), xoojinta isku-duwidda qorsheynta iyo deeqaha ee heer federaal iyo dowlad-goboleed, iyo kobcinta iskaashiga hay’adaha horumarinta iyo ganacsiga gaarka loo leeyahay.

Warsiduhu wuxuu iftiiminayaa kulammo heer sare ah, shirar farsamo, aqoon-isweydaarsiyo, hawlo awood-dhisid iyo matalaad caalami ah; kuwaas oo xoojinaya hufnaanta, isla-xisaabtanka, qorsheynta ku saleysan xogta iyo hirgelinta mudnaanta qaranka.

QODOBADA WARSIDAHA LUULYO 2026

Qodobadii ugu muhiimsanaa

• Dardargelinta warbixinta waxqabadka Xukuumadda DanQaran 2022-2026
• Horumarinta wada-shaqeynta Dowladda Federaalka iyo dowlad-goboleedyada ee qorsheynta iyo isku-duwidda horumarinta.
• Matalaadda Soomaaliya ee Madasha Sare ee Siyaasadda Horumarinta Waarta (HLPF) iyo ECOSOC.
• Daahfurka warbixinta fursadaha maalgashi ee warshadaha Soomaaliya.
• Xoojinta iskaashiga bah-wadaagta horumarinta, ganacsiga gaarka loo leeyahay iyo qurba-joogta Soomaaliyeed.
• Horumarinta awoodda shaqaalaha Wasaaradda iyo dhismaha guddiyada farsamo ee qorsheynta.
• Dib-u-eegista waxqabadka hoggaanka sare iyo mudnaanta istiraatiijiga ah ee Wasaaradda.